Katër raste të dhunës në familje brenda 24 orëve të fundit

Gjatë 24 orëve të fundit në vend kanë ndodhur katër raste të dhunës në familje. Në raportin 24 orësh të Policisë së Kosovës është bërë e ditur se rastet e dhunës kanë ndodhur në Prishtinë, Podujevë, Prizren e Rahovec, raporton Syri.net Kosova.

Në Prishtinë, një person është shoqëruar në stacion policor, pasi që i njëjti dyshohet se pas një mosmarrëveshje është kacafytur me një grua.

I dyshuari dhe viktima kanë refuzuar tretmanin mjekësor, ndërsa pas intervistimit janë liruar në procedurë të rregullt.

“Prishtinë 21.05.2023 – 13:00. Është shoqëruar në stacion policor i dyshuari mashkull kosovar nën dyshimin se i njëjti pas një mosmarrëveshje është kacafytur me viktimën femër kosovare. I dyshuari dhe viktima kanë  refuzuar tretman mjekësor, ndërsa pas intervistimit në konsultim me prokurorin, palët janë liruar në procedurë të rregullt|, thuhet në raport.

E në qytetin e Podujevës, një person ka rrahur tre persona në familje, ku njëri prej tyre ka pranuar edhe tretman mjekësor, teksa të dyshuarit Policia e Kosovës i ka sekuestruar një sopatë që dyshohet se ishte përodur në rast.

I dyshuari është dërguar në mbajtje.

“Podujevë 21.05.2023 – 23:30. Është arrestuar i dyshuari mashkull kosovar për shkak se kishte ushtruar dhunë fizike ndaj 3 viktimave, dy femrave dhe një mashkulli kosovarë, me ç’rast viktimës mashkull kosovar i kishte shkaktuar lëndime trupore, për të cilat i njëjti ka pranuar tretman mjekësor. Nga i dyshuari është sekuestruar një sopatë që dyshohet se ishte përdorur në rast. I dyshuari me vendim të prokurorit është dërguar në mbajtje për 48 orë”, thuhet në raportin 24 orësh.

Kurse në Prizren, një person është arrestuar pasi që i njëjti ka ushtruar dhunë psiqike ndaj gruas, i cili po ashtu është dërguar në mbajtje.

“Prizren 21.05.2023 – 12:30. Është arrestuar i dyshuari mashkull kosovar pasi ka ushtruar dhunë psiqike ndaj viktimës femër kosovare. Me vendim të prokurorit i dyshuari është dërguar në mbajtje”, thuhet në raport.

Po ashtu në Rahovec, një person ka ushtruar dhunë fizike e psiqike ndaj një gruaje, ku e njëjta ka pranuar edhe tretman mjekësor si pasojë e lëndimeve.

Edhe në këtë rast, i dyshuari është dërguar  në mbajtje për 48 orë.

“Rahovec 21.05.2023 – 11:00. Është arrestuar i dyshuari mashkull kosovar për shkak se kishte ushtruar dhunë psiqike dhe fizike ndaj viktimës femër kosovare e cila si pasojë ka pësuar lëndime dhe ka pranuar tretman mjekësor. Lidhur me rastin i dyshuari me vendim të prokurorit është dërguar në mbajtje për 48 orë”, thuhet në raport.